كيف أتعايش فى الكلية ؟

مساء الخير
النهاردة هنتكلم مع بعض فى موضوع مهم اوى لكل الشباب اللى داخلين مرحلة الكلية .
خصوصا الشباب اللى كليته بتبقا مش فى نفس بلده
النوع ده بيعانى اكتر من اللى بيبقا عايش مع اهله
وعلى فكرة الحياة بتبقا مختلفة تماما
ومن وجهة نظرى انها بتبقا اصعب للبنت
لان الحياة بين الولاد ابسط بكتير من الحياة بين البنات
لان انا كبنت بلاحظ ان البنات بتغير من بعض اوى وبتحقد على بعض ........ الخ .

تعالوا نشوف مع بعض ايه الاسئلة اللى ممكن تكون فى دماغ اى واحد داخل اولى كلية :

1- هل الافضل انى اخد سكن كنيسة ولا سكن اهالى ؟
نرد ونقول انه من الافضل لو انتى بنت انك تاخدى سكن كنيسة لكن لو ولد مش هتفرق اوى بس يفضل بردو سكن كنيسة عشان بيخلى الولد يبقا ملتزم اكتر فى المواعيد والتصرفات .

2- كيف اتعامل مع اصحابى فى الغرفة ؟
- لو بنت يفضل انها تبقا حريصة جدا فى التعامل عالاقل السنة الاولى لحد متعرفى اذا كان صحابك اللى معاكى كويسين ولا لأ
- وياريت بلاش تحكى اى امور شخصية مع اى حد خصوصا انك هتبقى مضايقة شوية الفترة الاولى .
- حاولى يكون ليكى خصوصية فى كل ادواتك سواء لبسك او اى ادوات شخصية لانى بلاحظ انه البنات بتستخدم حاجة بعض وده مش صح .
- اما لو ولد يبقا تحاول ان تكون ليك شخصيتك لان فى الفترة دى هتلاحظ ان صحابك عايزين يفرضوا شخصيتهم عليك .
- وبردو تبقا مستقل عنهم فى كل ادواتك الشخصية .
- ومتحكيش امورك الشخصية لاى حد منهم لحد متتأكد من شخصيتهم كويس .

3- كيف اقوى علاقتى بربنا؟
مبدئيا ربنا هو بيبقا صديقك فى الغربة وبعد كده صحابك ومعارفك
عشان كده لازم نقوى علاقتنا بربنا وده بيبقا افضل فى سكن الكنيسة لانه بيكون فى التزام فى الصلاة وحضور القداسات والاعتراف والتناول والصوم والحياة الروحية عامة .

4- حياتى داخل مبنى الكلية ؟
- طبعا اول سنة بنبقا ابيض يا ورد مش عارفين اى حاجة فى اى حاجة عشان كده يفضل اننا نتعرف على طلبة من سنة تانية او تالتة او حتى رابعة ليه بقا؟
عشان يفهمونا نظام الدكاترة واسلوبهم وطريقة الدراسة وطريقة مزاكرة المواد لانها طبعا بتبقا مختلفة تماما عن طريقة الثانوى
- كمان لازم يبقالنا نظام معين فى الكلام مع الدكاترة مش زى الثانوى خالص .
وياريت نكون عاديين جدا فى التعامل مع الدكاترة ويفضل الدكتور مش يحفظ اسمك لانه مش هيحبك زى استاذ الثانوى بل بالعكس ممكن يحطك فى دماغه خاصة الطلبة المسيحيين .

5- طريقة التعامل بين الجنسين ؟
بيعانى بعض البنات وبعض الولاد من الخجل فى التعامل مع بعضهم فى الاول عشان كده ياريت كل واحد يحط فى دماغه ان ده اخويا وبس و نتعامل بحرص والهزار يكون فى حدود
لان فى ناس فاكرة ان الكلية دى تعارف عالبنات والولاد وبس
لا طبعا الكلام ده مش صحيح وبعد كده العلاقة هتبتدى تقوى مع مرور الوقت تدريجيا .

منقووووووووول