متى تقول / تقولى كلمة أحبك ؟

عنوان الموضوع زي ما أنتم شايفين متى تقول/تقولي أحبك؟ هنتكلم من ناحية المنطق, الدين ,العادات والتقاليد
هنستخدم قلبنا .. لكن كمان هنستخدم عقلنا



الحب
في الأول خالص نعرف يعني إيه كلمة أحبك؟ كلمة الحب؟؟؟
لو جبنا المعنى كلمة LOVE من أي قاموس .. ده اللي هنلاقيه


الحب :عمق, العطاء, مشاعر وعاطفة تجاه شخص ما, مثل التي تنشأ من علاقات, أو ادراك صفات جذابة في شخصية معينة ... الحب بيبتدي بـإعجاب ... إلخ
أو
الحب : شعور ورغبة الجذب تجاه شخص واحد هو والرغبة في ان يكونوا واحد ؛وهو الإنفعال الرومانسية..


ييجي السؤال بقى؟؟؟ هل هو ده الحب....


ام أن

الحب = مسؤلية = التزام
الحب مش بس مشاعر واحساس ورومانسية ومظاهر تجمل
الحب التزام ومسئولية وحياة تبني مع شريك الحياة وزي ما بيكون فيها عاطفة لازم يكون فيها عقل ومش في اي وقت اقول بحبك و مش لاي حد


كلام أكيد جميل جدا ويمكن معظمنا عرفينه
الحب مش كلام... مش لعبة... مش هزار... الحب مسئولية ... التزام
كلمة بحبك رباط بيجمع بين إتنين... كلمة بحبك معناها تضحية ... تضحية؟؟
آه تضحية...

الدين
هنا ندخل على رأي الدين... احنا كأولاد للملك السماوي لازم نتعلم منه ونعمل زيه... الله لما احب العالم بذل ابنه الوحيد علشانك وعلشاني ... علشان ينجينا ... علشان بيحبنا... فهمت يعني إيه تضحية؟؟؟
الحب مش بس كلام... الحب فعل قبل الكلام... الله كان يفكر في فكرة الفداء من من زمان... مثل

* لما شعب اسرائيل كانوا في البريه -أيام موسى- كان الله عملهم نظام يمشوا عليه ... وكانت كل حاجة الله يكلم بيها موسى ترمز للمسيح... فمثلا طريقة تقديم الذبيحة أو المحرقة

* غير كده شعب اسرائيل لما كان بيمشي في البريه كانوا بيمشوا على هيئة صليب.. تابوت العهد في لنص... 3 اصبات في الشمال.. 3 في الجنوب .. 3 في الشرق .. 3 في الغرب... وكإن فكرة الفداء تشغل فكر الله منذ البدء , وكأنه ينظر للبشرية من خلال الصليب الذي سوف يحمله الابن

لازم الواحد يقدر إن الحب تضحية
علشان علاقة الاتنين ببعض في الجواز ذي علاقة المسيح بكنيسته
الراجل راس المراة... المسيح راس الكنيسة... المسيح قد ذاته لاجل الكنيسة... الراجل يقدم ذاته من اجل المراة -إذا إطره الأمر -

المنطق
طب دي الناحية الدينية .. عايزين نقتنع شوية... يمكن المنطق يقنع و زي ما البعض قال

الحب مع المنطق.... الحب لو ما انبنى على عقل وتفاهم قبل العاطفه ممكن يضيع بأقل عثره
إيه رأيكم؟ على ماظن كلنا متفقين إن لو حطينا العاطفة قبل المنطق هانتجرح وهنتعب قوي, لو مفيش نصيب
يعني مثلا لو في فرق كبير في السن. أو مسافات بعيدة...لو في فرق كبير في الدرجة الروحية …لو مستحيل التفاهم... الخ في أوقات عقلنا بينصحنا بـإن الموضوع مش هينفع لكن احنا مش بنسمع... والنتيجة بتبقى مش لصالحنا

العادات والتقليد

في مجتمعنا المصري مش كتير بيتقبلوا موضوع الحب... وحتى لو في بيبقى في حدود محطوطة أكتر من يمكن الحدود اللي احنا نفسنا بنعملها ... كتير لما يفكروا في الحب اللي ملهوش مستقبل بيخافوا منه ..

يعني حب ملهوش مستقبل= مش مقبول في مجتمعنا
نرجع لسؤالنا بعد كل ده متى نقول كلمة أحبك؟؟

زي ماقلنا كلمة حب مسئولية... مش بس في الوقت نفسه لكن كمان بعدين ... علشان نسمح لنفسنا نقول كلمة أحبك لحد تاني... لازم نفكر الاول في الحاجات ده ...

1. هل أنا مستعد من الناحية الاجتماعية إني ارتبط -مش لازم ارتباط يعني خطوبة أو جواز.. لكن في علاقة حب -

2. هل أنا مستعد من الناحية الاقتصاديه إني أفتح بيت, بعد حتى سنة وإتنين -علاقة أطول من كده بتبقى في الغالببيه ملهاش مستقبل-

3. هل أنا مستعد من الناحية الروحية... هل حياتنا الروحية في نفس المستوى؟؟؟ هل أنا أخدت اكتفاي من ربنا إني أقدر اشغل تفكري ومشاعري وكل حواسي بـحد تاني ... -أكيد مع ربنا,,, لو ده حسب مشيئته-

4. هل أنا مستعدة نفسيا إني اتحمل ضغط فوق الضغط بتاع الحياة اللي أنا عايشة فيها... -خليكم فاكرين الحب مسئولية-

5. أنا ممكن أقادم إيه للشخص ده... هل كده شخصيتي اكتملت؟؟

الحب مش لعبة أو حاجة كده... الشباب لازم يعرفوا إن في فرق كبير مابين الاعجاب والحب
الحب أصلا مايجيش غير لما الإتنين يعرفه بعض اوى اوى ويكون في توافق بينهم...
وبعدين لازم يكون اللي بيحب ناضج في مشاعره علشان تبقى مشاعره حقيقيه ...
كمان مينفعش الواحد يحب صح غير لما يعرف الحب نفسه... الله... الله محبة … لازم يعرف الله الأول.. وبعدين يحب نفسه علشان يعرف يقدم حاجة للطرف الآخر

طبعا اسئلة كتيرة تانية...
يمكن تشوفه إن ده معوقات عن الحب... لكن صدقوني كل ماتحطوا الاسئلة دية بنكون حطينا هدف نحققه قبل مانسمح لنفسنا بأي علاقة ... فكروا شوية كده لو إنت مش عارف/عارفة شخصيتك إزاي هتعرف شخصية اللي بتحبيه/بتحبها

في الآخر يبقى احنا متفقين إن لازم ندخل المنطق/عادات وتقاليد/ دين... ونستخدم عقلنا-اسمحولي أقول-قبل قلبنا في الموضوع... ولو الموضوع ماشي بإرادة ربنا... يبقى نسمح بدخول الشخص ده جوه قلبنا