ازاى يعنى ....؟!!
حبيبى الى ماليش بعديه..ولا قبليه...وهو كل حاجة بمعنى كل حاجة
يمكن بقالى كتير مكتبتش حاجة عننا بس برغم انى مكتبش بس فى مليون حاجة ليك جوايا
بقولها ليك بقلبى قبل لسانى
حبيبى ...عارف انك انت بجد النبض الى قلبى عايش بيه
لما بتكون مش جنبى ولو حتى بعيد شوية
بحس نفسى مخنوقة اوى ..عتبانة عليك
عتبانة عليك بعدك عنى حتى لو ايه السبب؟
عتبانة عليك انك بتتنفس هوا انا وانت مش جنب بعض فيه
عتبانة عليك انك بتضحك لحد تانى غيرى
عتبانة عليك انك مشغول فى ورقة وقلم وحسابات تانية
حتى لو كان شغلك
حبيبى ...عارف لما بنكون زعلانين من بعض
ببقى متبهدلة من العياط وتلاقينى جاية عليك وعارفة انك زعلان
وارمى نفسى فى حضنك اوى واقولك انا اسفة
حتى لو كنت لسه زعلان بحس انى كده عاملة زى العيال الصغيرة
وانك بابايا الى بجرى فى حضنه واحس انى مطمنة اوووووى
حتى لو لسه زعلان مببقاش عاوزة احس انى مزعلاك
حبيبى...انت احلى سبب بيخلينى عايشة الحياة دى باستمتاع غريب
لاول مرة بعيشه معاك
بيخلينى اضحك بصوت عالى اوووى عشان عارفة انى معاك
بيخلينى اعمل احلى جنان عشان مطمنة بيك
اصلى بحس معاك بحرية
حرية كان نفسى اطلعها من جوه اووووووى
وجه وقتها معاك انت وبس
أ م ا ن
الكلمة دى انا محسيتش بيها من تانى غير معاك
كنت مفتقداها من ساعة ما بابا اتوفى
وكنت فاكرة انى عمرى تانى ما هلاقيها
انى حتى لو اتجوزت مش هحسها اوى
لكن معاك الحياة بتختلف...زى ما بقولك دايما
بقيت حاسة انك وررايا فى ضهرى
بتخاف عليا حتى من نفسى ومن دماغى الى ممكن تضرنى
بتحبنى من غير شروط
بتحبنى لانى أنا
ودى اكتر حاجة بتخلينى مبسوطة انى مش مضطرة اغير نفسى
او اعدلها عشان ارضيك لانى بحبنى زى ما انا
وكنت هبقى مضايقة انى بعدلها لحد
بحبك لما بتقولى انتى باكيج كلك ع بعض لازم اخدها زى ما هيا
وانك لما بتحبى حد عيوبه بتحبيها لانك بتقدرى تتعاملى معاها
بحبك
دى بتختصر احاسيس كتيرة اوووووووى
بزعل لما بقولها لانها قليلة
بحبك لانى فاكراك علطول
بحبك لما انسى احط ورقة كل يوم فى قميصك
وانت تدور ومتلقيهاش تزعل منى
واقولك معلش نسيت اكتبلك حاسة بايه النهاردة
فرحانة بيك ...ولا واحشنى ولا حجات كتير
حبيبى ...انت نعمة حياتى
ورضا ربنا عليا
ودعوات اهلى ليا
انت احن قلب عليا واطيب قلب ممكن اترمى فيه ومقلقش
حبيبى ...ربنا يخليك ليا يا احلى حاجة حصلت ليا من زمان اوى
زى ما بقولهالك علطول
انت رجلى وسندى وصاحبى واخويا وابويا
انت صحبتى وونسى وانسى
بحبك يا اغلى الناس
يبقى اواى يعنى قرب يعدى سنة علينا
وانا بحبك كل ده اكتر كمان من أيام الخطوبة ؟؟
عارف ليه ؟؟
لانك
ح ب ي ب ى
السبت أكتوبر 09, 2010 6:39 pm