بيقولو الشيطان شاطر

قالوا الشيطان شاطر قولت ليه هو معاه من الشهادات قد ايه قالوا انت لسه صغير مش قده ده بسببه ضل من الناس العدد الكتير ، ضحكت وقلت لا متخافوش انا ابن الملك وملكه بيجرىفى دمى متورث من سنين
واحد حكيم نصحنى وقال :- يا ابنى انا راجل عجوز غلبان وكلامى اللى هاقوله موروثفى عيلتى من زمان
الشيطان ده كان مليان حكمة وكامل الجمال ده كان كروب برتبة عالية وتحت ايده كتير كتير من الكاروبيم وبغوايه منه من راس الحية ضل بسببه ملايكة كتير
ومن الجمال والكمال والرتبة العالية وطيرانه حول الكون رحال كان فاكر نفسه كبير اكبر من اكبر كبير
قام رايح هو واتباعه الضالين لجبل الاجتماع فى الفردوس اللى هناك هناك فى اقصى شمال الكون كان فاكر نفسه هيملك وهيجلس على كرسى العرش فاكرها سهلة مش راكب دماغه غرور وخلاص صابه الفجور
وفى لحظة الرب رماه وفى اسافل الارض نفاه ومن ساعتها عايز ينتقم ويضل كل الناس ولو حتى المختارين
يا ابنى ده كلامى انا قولته وخايف عليك دول مش دم ولحم دول ارواح ولهيب النار دول رؤساء وسلاطين دول اجناد الشر الضالين
ومش كل من قال يا رب يا رب دخل ملكوته ولا كل من رشم صليب على صدره نجا من عقوبة موته
سمعت انا كلام الحكيم ومغيرش جوايا شىء كنت فاكر نفسى عنتر وفاتح صدرى ولسان حالى بيقول للزمان انا موجود كنت فاكر انه بميراث الملك جوايا اقدر اقاوم واصمد واحارب الاثمين
لكن وفى اول مواجهة وبحيلة بسيطة من كروب صغير لعين وقعت فى الشرك الدفين قمت وحاولت اقاوم وقعت تانى وتالت ورابع
وحاولت اقاوم وهجمات الشر تزيد وتزيد وفى وسط شماتة عدوى وسخريته على سقطتى لقيت بسمة حانية على وش ابونا بتقولى ارجع للبيت الكبير صوم وصلى وحارب من هناك واعترف بخطاياك واتناول وامن بالخلاص وحب عدوك قبل صديقك وامسك انجيلك سلاح جوة ايدك
ارجع ارجع وحاول تتعلم ازاى تقاوم تانى
ارجع للبيت الكبير ارجع للبيت الكبير